Ish-zëvendëskryeministrja Edita Tahiri deklaroi të hënën se dështimi i përsëritur për konstituimin e Kuvendit të Kosovës kërkon një marrëveshje të gjerë politike, duke propozuar një ndarje specifike të pushtetit ndërmjet dy partive kryesore.
Pas tentativës së katërt të dështuar për të zgjedhur kryesinë e Kuvendit, znj. Tahiri, përmes një postimi në rrjetin social Facebook, sugjeroi që Partisë Demokratike të Kosovës (PDK) t’i takojë posti i kryeministrit. Në këmbim, sipas saj, liderit të Lëvizjes Vetëvendosje (VV), Albin Kurti, duhet t’i premtohet posti i presidentit pas përfundimit të mandatit aktual të Vjosa Osmanit.
“Ky dështim i katërt në konstituimin e Kuvendit kërkon marrëveshje politike për organet e Kuvendit dhe për qeverinë e koalicionit,” shkroi Tahiri. Ajo shtoi se një mandat presidencial për znj. Osmani ka qenë i mjaftueshëm, duke iu referuar asaj si “presidente gojëmbyllur”.
Propozimi i saj vjen në një kohë bllokade politike, ku paaftësia për të zgjedhur kryetarin e Kuvendit po pengon formimin e qeverisë së re pas zgjedhjeve të 9 shkurtit.
Leave a Reply